“Tavrida” trassasında yük maşnası yengil maşnane çatışı, neticede üç adam elâk oldı, dep bildire Rusye FVN-niñ Qırım idaresi.
Müessise malümatına köre, qaza bazar künü kündüz, Aqmescit - Kefe yolunıñ 130-ıncı kilometrinde, Tana Geldi (Sennoye) köyüniñ burulışı yanında oldı.
İlk alınğan malümatqa köre, Ford Fiyesta aydavcısı yol çetine çıqıp, soñ qarşı yolaqqa keçti, anda ise MAN yük maşnasınen çatıştı.
“Yol qazası neticesinde üç adam elâk oldı: 1980 yılı doğma er kişi, 1979 yılı doğma qadın ve 2007 yılı doğma bala”, - denile beyanatta.
2018 senesi dekabr ayında Qırım qurtarıcıları Qırımda büyük yol qazalarınıñ sayısı arttı, dep bildirdi. Qırımda 2019 senesiniñ ilk üç ayı içinde keçken seneniñ aynı müddeti içinde mesüliyetke çekilgen aydavcılarnıñ sayısı bir buçuq qat ziyade oldı.
