Qırımlı advokat Ayder Azamatov Yaltadaki «Hizb ut-Tahrir davasınıñ» mabüsi Arsen Cepparovnıñ Rusiye SİZOsındaki şaraitlerini Rusiye Baş prokuraturasına şikâyet etecek, dep bildirdi.
«Arsen mahkemege bulunğan kamerası yıqılayata, dep bildirdi: kameranınıñ tavanından necaset ve suv aqa, çünki yuqarıdaki kamerada kanalizatsiya ağları iprandı. Suv ve nem er yerde, antisanitariya», – dep yazdı Azamatov Facebook saifesinde.
Bundan ğayrı, Cepparov tutulğan kamerada VİÇ, SPİD, verem ve diger hastalıqlarnen insanlar qala, dep bildirdi advokat.
Azamatovnıñ qayd etkenine köre, Arsen Cepparov «SİZOğa qapatılğan soñ onıñ ciddiy sağlıq problemleri bar edi ve üç yıldan berli bu problemlernen anda dayana».
Rusiyeniñ Cezalarnı yerine ketirüv federal hızmetiniñ vekilleri Azamatovnıñ aytqanlarını açıq sürette izaatlamadı.
Aprelniñ 4-nde haber etilgenine köre, Rostov-na-Donu şeerindeki Şimaliy-Kavkaz okrugınıñ arbiy mahkemesi «Yaltadaki Hizb ut-Tahrir davasını» ekinci kere baqmağa başladı.Mahkeme oturışuvında prokurorlar qabaatlav qararlarını seslendirdi, davanıñ altı mabüsi
Muslim Aliyev, İnver Bekirov, Vadim Siruk, Emir-Üsein Kuku, Refat Alimov ve Arsen Cepparov ise özüni qabaatsız dep sayğanlarını ayttı.
Advokat Ayder Azamatov altı mabüsniñ sıñırlav müddetini ev apsine deñiştirmege rica etti, amma mahkeme razı olmadı.
Daa evel Yaltadaki «Hizb ut-Tahrir davasınıñ» altı mabüsi Rusiyeden işğal etilgen Qırımğa avuştırılğan edi. Olarnıñ davaları tekrar tahqiqatqa qaytarılğan ve qabaatları deñiştirilgen edi.
2019 senesi yanvar ayında Qırımda Rusiye tahqiqatı Yaltadaki davanıñ mabüslerine yañı qabaatlarını aydınlattı.
Bu dava boyunca qabaatlanğanlar Arsen Cepparov, Refat Alimov, Emir-Üsein Kuku, Müslim Aliyev, İnver Bekirov ve Vadim Siruk 2016 senesi fevral-aprel aylarında Yaltada tutulğan edi. Olar Rusiyede yasaqlanğan «Hizb ut-Tahrir» islâm siyasiy teşkilâtında iştirak etkeninde qabaatlana.
Ukraina Tış işler nazirligi Rusiyeden Yaltadaki «Hizb ut-Tahrir davasınıñ» mabüslerini azat etmesini talap ete.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
