Rusiyeniñ Tataristan Cumhuriyetinde dronlarnıñ ücüminden soñ 12 insan yaralandı, dep haber ete yerli akimiyet.
Operativ hızmetler Yelabugada yedi yaralanğan kişi aqqında bildirgen edi, aralarında eki genç bar. Baza Telegram kanalı yazğanına köre, yerli köllecniñ beş studenti yaralandı.
Aprelniñ 2-nde saba dronlar Tataristannıñ müessiselerine ücüm etti – Yelabuga ve Nijnekamskta. «Alabuga» hususiy iqtisadiy alanında patlavlar aqqında haber etildi. Yerli akimiyet ücümni aman-aman birden tasdıqlap, ciddiy zarar yoq, müessiselerniñ tehnologik esnası bozulmadı, dep bildirdi.
Ukrayına kütleviy haber vastaları Mudafaa nazirliginiñ Baş istihbarat idaresindeki menbalarına esaslanıp, Ukrayına istihbaratçılarınıñ mahsus operatsiyası kerçekleştirildi, dep bildirdi. Ukrayına istihbaratı uçucısızlar Yelabugadaki zavodqa ücüm etti, dep bildirdi, anda «Geran-2» olaraq gizlengen İran «şahedlerini» toplay ekenler.
Telegram kanalları yazğanına köre, uçucısızlardan biri «TANEKO» cermay işletken zavodına darbe endirmege tırışıp, tehnologik donatmağa ücüm etti, yanğın çıqtı. Resmiy olmağan malümatqa köre, eñ az üç kişi yaralandı.
Azatlıq Radiosınıñ menbası bildirgenine köre, Nijnekamskta cermay işletken zavodqa qarşı dron ücümi Ukrayına telükesizlik hızmeti ve Baş istihbarat idaresiniñ bir operatsiyası ola. Menbanıñ malümatına köre, Ukrayına dronı ilk cermay işletken tertibatqa ücüm etti.
Yelabugağa qarşı darbe büyük istilâ başlağanından eñ uzaq mesafeli ücümlerden biri oldı – şeer sıñırdan aman-aman 1300 km mesafede yerleşe.
Bıltır iyul ayında jurnalistler Tataristandaki Yelabuga kölleciniñ studentlerini hususiy iqtisadiy alandaki zavodda «Şahed» uçucısızlarını toplamağa celp eteler, dep bildirdi.
Rusiyeniñ Ukrayınağa qarşı büyük istilâsı başlağan soñ Rusiye regionlarına muntazam sürette dronlar uçıp kele, neticede zarar körgen binalar ve yaralanğan insanlar ola. Rusiye Mudafaa nazirligi bildirgenine köre, ücümler Ukrayına tarafından yapıla. Kyiv çoqusı haberni izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
