«Memorial» Rusiye aq qorçalayıcı merkezi Rusiyede yasaqlanğan «Hizb ut-Tahrir» firqası ile alâqaları bar olğanından şübheli sayılğan 10 Tataristan (Rusiye) sakinini siyasiy mabüs olaraq tanıp, olarnı azat etmege çağırdı. Mahkeme esnası Samarada keçe.
Aq qorçalayıcılarnıñ aytqanına köre, dava malümatlarından iç birisi tutulğanlar zorbalıq cinayetlerini kerçekleştirmege niyetlengenini isbatlamay. «Memorial» dava mabüsleri terror areketlerini planlaştırmağan edi, dep israr ete. Şu sebepten şübhelilerniñ cinaiy taqibi sebepsiz ola, dep tüşüne aq qorçalayıcılar, dep haber ete Azatlıq Radiosı.
«Hizb ut-Tahrir» firqası ile alâqalar sebebinden politsiya 2017 senesi oktâbr ayında Tataristannıñ on sakinini tutqan edi. Bu dava boyunca 2019 senesi mart ve aprel aylarında Samarada daa on kişi mahküm etildi. Olarnı 13 yıldan 22 yılğa qadar azatlıqtan marum ettiler.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
