Rusiye pasportlarını almağa mecbur olğan Ukrayınanıñ vaqtınca işğal etilgen topraqlarınıñ sakinleri qanun tarafından taqip etilmemeli. Bunı Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva Qırım.Aqiqatqa ayttı.
«Fikrimiz olğan qanunlarğa esaslana. Esas qanun bar, oña köre, bu vesiqalar uquqiy aqibetleri olmağan, işlemegen vesiqa dep adlandırıla. Ve İşğalden azat etüv ve reintegratsiya strategiyası bar, anda pasportlarnıñ zorlap berilüvi halqara gumanitar uquqqa qarşı cinayet olaraq adlandırıla. Biz devlet olaraq halqara mahkemelerge muracaat etken edik, anda böyle pasport alğan insanlarnı cinayetçi degil, qurban dep adlandıramız», – dep ayta Taşeva.
Taşevanıñ aytqanına köre, temsilcilik Ukrayına qanunlarınıñ deñişmelerini muzakere etmege davet etildi. Qanun leyhası azırlanıla. O, Rusiye zapt etken yerlerde Rusiye pasportlarınıñ berilüvini teşkil etüv içün mesüliyet belgilemekte.
«Körgen vesiqamızda işğal etilgen topraqlarda vatandaşlarımızğa qanunsız pasport berilüvinde iştirak etkenler cinaiy mesüliyetke çekilecek, dep aytılğan edi. Meselâ, pasport bölükleriniñ reberleri, esnasnı teşkil etkenler, pasport bergenler. Ekincisi – insan bu pasportnı işğalci memuriyette çalışmaq içün alsa. Ya da Ukrayına devleti tarafından menfaatlarını temsil etmeknen vekâletli olğan, amma ant sözüne sadıq olmayıp, (işğalci devlet menfaatlarında – muar.) çalışmağa ketken insanlar. İşğal etilgen yerlerde yaşağan ve vaziyetniñ reinesi olğan adiy insanlar mesüliyetke çekilmemeli», – dey Taşeva.
Böyle mesüliyet aqqında Ukrayınanıñ vaqtınca işğal etilgen topraqlarnıñ reintegratsiya naziri İrına Vereşçuk da aytqan edi. Nazirniñ haberinde böyle «pasportlaştıruv» esnasından kimler mesüliyetli olacaq aytılmadı.
Qırım.Aqiqat Vereşçukqa muracaat etip, cinaiy mesüliyet teklifini tafsilâtlıca aydınlatmasını rica etti. Muracaat em oquyıcılarımız, em aq qorçalayıcılarnıñ suallerinden ibaret edi. Hususan, angi areketler içün mesüliyet olacaq ve qanun leyhası azırlanğanda aq qorçalayıcı teşkilâtlar mesleatlarğa celp etilecekmi. Ukrayınanıñ vaqtınca işğal etilgen topraqlarnıñ reintegratsiya nazirligine böyle informatsion muracaat yapıldı. Avgustnıñ 3-nde nazir muavini Anatoliy Stelmah bizim suallerimiz «nazirlik aks etken ve qayd etken» malümatqa ait degil, bazı sualler ise «añlatılmalı», dep cevap berdi. Qırım.Aqiqatnıñ muracaatı vatandaşlarnıñ muracaatı olaraq tasnif etildi. Soñra nazir muavini Qırım.Aqiqat jurnalistiniñ muraacaat «müellifini bilmek imkânsız» dep, onı baqmağa razı olmadı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
