Halqara uquq kollektiv sürgün etmeni köz ögünde tutmağanı içün Qırımğa qanusız şekilde kelgen Rusiye vatandaşları individual qararlarğa köre yarımadadan çıqarılacaq. Bunı Ukrayina Prezidentiniñ Qırım MC daimiy temsilcisi Tamila Taşeva "Ukrinform" ukrayin agentligine intervyü berir eken bildirdi.
"Bütün Rusiye vatandaşları aslında müstemlekecidirler, çünki olar işğal etilgen topraqqa onıñ demografik terkibini deñiştirmek içün keldiler. Olar cinayet ortağıdır. Ve topraq azat etilgenine qadar öz isteginen andan ketmeseler, biz olarnı andan mecburen sürgün etecekmiz. Halqara uquq kollektiv sürgün etmeni köz ögünde tutmay, kollektiv sürgün etüv yasaqtır", - dep qayd etti o.
Taşeva, söz 2014 senesi Qırımnıñ işğal etilmesinden soñ Ukrayina toprağına qanunsız şekilde kelgen Rusiye vatandaşları aqqındadır, dep bildirdi.
"Çünki biz Qırımda mecburiy pasportlaştırmanıñ qurbanları olğan bütün Ukrayina vatandaşlarını qanunlarımızğa köre Ukrayina vatandaşı kibi tanıymız. Bunı qayd etmek pek müimdir, çünki Rusiye propagandası qırımlılarnıñ Qırımdan sürgün etilecigini bildirip açıq şekilde yalan darqata. Şunıñ içün qayd etem ki, yalıñız kiriş şartını bozğan Rusiye vatandaşları yarımdanı terk etmelidir", - dep añlattı Taşeva.
Onıñ sözlerine köre, bazı kategoriyalar Ukrayina topraqlarında oturma izni ala bilecekler.
"Bu, misal olaraq, avdetçi olğan tamır halqlarnıñ temsilcilerine ait olacaq. Bular 2014 senesi Ukrayina vatandaşlığınıñ alınması protsedurasına başlağan ve buñı yapmağa yetiştirmegen biñlernen adamdır", - dedi prezident temsilcisi.
Daa evel Tamila Taşeva "Ukrinform" ukrayin agentligine intervyü berir eken, yarımadanıñ işğalden azat etilmesinde soñ Qırımda saylavlarnıñ keçirilmesi bir sıra miyarnıñ yerine ketirilmesine bağlı olacağı aqqında aytıp bergen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
