Qırımda ükümler şiddetiniñ artması yarımadanıñ Rusiye akimiyeti arasındaki telâşqa delâlet ete – böylece olar Ukrayinanı desteklegen areketni "bastırmağa" tırışalar. Bunı "Ukrayina aqiqatı" neşrine Ukrayina Prezidentiniñ Qırım MC Daimiy temsilcisi Tamila Taşeva bildirdi.
"Yalıñız mart ve aprelniñ yarısında işğal mahkemeleri 20.3.3 ("RF ordusını itibardan tüşürme") madesi ile 42 dava alğan. Olardan 35-i içün artıq qanunsız qararlar çıqarılğan ve cöremeler miqdarı belgilengen. Rusiye ordusını "itibardan tüşürme" maddesiniñ mevcut olğanı tek bir yıl içinde eñ az 352 qırımlığa qarşı dava açılğan. Amma tamamınen saçma ükümlerniñ bu kibi artması işğalciler ve kollaborantlar arasındaki telâşqa delâlet ete. Böylece olar yarımadanıñ sakinlerini qorqutmağa ve olarnıñ Ukrayinanı desteklegen areketini "bastırmağa" tırışalar", - dedi o.
"İşğalciler içün atta adiy Ukrayina timsalleri de artıq arbiyleriniñ itibardan tüşürüvdir, çünki olarnıñ işğal mahkemeleriniñ qarar ve ükümlerine ilâve etilgen "motivatsiya" mektüplerinne köre, Ukrayina Silâlı Quvetleri öz asker urbasında devlet bayrağını qullanalar", - dep qayd etti Taşeva.
Rusiyede ve işğali altındaki topraqlarda Ukrayinağa qoltutqan sakinler taqip etile. Rusiye tarafdarı bloger Aleksandr Talipov Telegram kanallarında Ukrayinağa qoltutqan qırımlılarnıñ şahsiy malümatını derc ete. Talipovnıñ şikâyetleri neticesinde qırımlılarnı Rusiye ordusını «itibardan tüşürgeninde» qabaatlap, memuriy ve cinaiy mesüliyetke çekeler. Ukrayina prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
