2023 senesi Rusiye Federatsiyasında ve Ukrayinanıñ işğal etilgen topraqlarında ordunıñ itibarını tüşürgeni içün er altıncı ceza Qırımda qayd etildi. Açıq davalarnıñ sayısı 70,6% arttı, dep bildirdi Ukrayina prezidentiniñ QMC daimiy temsilcisi Tamila Taşeva.
Onıñ aytqanına köre, Rusiye ordusını "itibardan tüşürüv" maddesine istinaden 800-den ziyade taqip qayd etildi.
"Er bir davanıñ arqasında insan taqdiri, işğalcilerden aşalav ve para cezası, em de basqı altında teslim olmağan ukrayin ve qırımtatarlarnıñ adaletke olğan istegini ve iradesini saqlav", — dep qayd etti Taşeva.
O şunı da qoştı ki, 2023 senesi Rusiye mahkemelerinde ordunıñ "itibardan tüşürüv" maddesine istinaden davalarnıñ sayısı, 2022 senesine baqqanda, 47% eksildi. Qırımda aynı vaqıtta davalarnıñ sayısı 70,6% arttı.
"Qırımlılarnıñ qarşılığı arta ve işğalciler onı yeñip olamaylar, Rusiyeniñ regionlarında ise cenkke qarşılıqnıñ eksilüvi qayd etile", - dep qayd etti o.
Taşeva şunı da ayttı ki, 2022 senesi "itibardan tüşürüv" davaları boyunca cezalanğan Qırım sakinleriniñ sayısı umumiy miqdarnıñ 4,6% teşkil etti, 2023 senesi ise bu köstergiç 15,5%-ğa arttı. Memurnıñ aytqanına köre, taqipniñ aman-aman er altıncı adeti Qırımda qayd etildi.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı olğan qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını "areketsizleştirgenleri" içün yaqalana ve memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
