Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva Rusiye tarafından Şimaliy-Qırım kanalınıñ qapatıluvı sebebinden yarımadanıñ ekotsid qabaatlavları ne içün sebepsiz olğanını añlattı.
Onıñ aytqanına köre, 2014 senesine qadar Qırımğa 1 mlrd kub metri suv berile edi, 75%-ı köy hocalığı ve sanayı içün kerek edi.
«Amma yerli suv – toplanğan aqqan suv, yerastı suvlar (tahminen 950 mln kub metr) – yerli ealiniñ ihtiyacları içün qullanılğan edi. Ve işğalciler Ukrayına ekotsid yapa, insanlarğa terror yapa degende er vaqıt cevap bere edik: Baqıñız, yerli eali içün suvıñız yeterlidir», – dep qayd etti memur Ukrayına milliy telemarafonınıñ yayınında.
Taşeva qayd etkenine köre, suv tek köy hocalığı ve sanayı obyektleri ya da arbiy bazalar içün yetmey, şunıñ içün Rusiye yapqan ilk şey – Şimaliy-Qırım kanalından suv berildi.
Daimiy temsilci hatırlatqanına köre, 2014 senesinden berli Qırımnıñ Rusiye akimiyeti yerastı suvlarnıñ çıqarıluvına pek çoq litsenziya berip başladı, bu da ekologik vaziyetke tesir etti, çünki topraqlar tuzlandı.
Ukrayınağa qarşı tam istilâ başlağan soñ Rusiye Kahovka suv anbarından Qırımğa suv berilüvini tertip etken Şimaliy-Qırım kanalınıñ bütün gidrotehnik inşaatlarını zapt etti. 2022 senesi fevralniñ 27-nde Rusiye arbiyleri vaqtınca bent, maşina köprü ve kanalnıñ esas bölme inşaatını bozdı.
Ukrayına telükesizlik hızmeti Şimaliy-Qırım kanalınıñ inşaatları ve Rusiyeniñ Ukrayınağa qarşı cenkinde diger cinayetler sebebinden Rusiye zabitleri Mihail Yasnikov ve Dmitriy Markovğa qarşı qabaatlavlarnı mahkemege yolladı.
Ukrayına Devlet ekologik inspektsiyasınıñ malümatına köre, Rusiye Şimaliy-Qırım kanalından Dnipro suvını berip, Ukrayınağa 15 milliard ğrıvnâ zarar ketirdi.
Ukrayına prezidentiniñ buyruğınen 2021 senesi tasdıqlanğan Qırımnıñ işğalden azat etüv ve reintegratsiya strategiyasına köre, Dniprodan yarımadağa suv berilüvi region Kyiv kontroline qaytarılğan soñ başlatılacaq edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
