Al-azırda Qırım işğalden azat etilgen soñ statusınıñ eñ az üç variantı muzakere etile, dep bildirdi Ukrayına prezidentiniñ Qırımdaki temsilcisi Tamila Taşeva.
«Qırımnıñ statusınen bağlı munaqaşa bar olğanını gizlemek yañlış olur edi. Devlet organları, ekspertler, qırımtatar halqınıñ vekilleri Qırım Muhtar Cumhuriyeti ve Aqyar şeeri, qırımtatar halqınıñ kelecegini belgilemek aqqınen Qırım muhtariyeti ya da Qırım vilâyeti olacaq, dep muzakere eteler. Al-azırda Ukrayına Anayasasına bir deñişme kirsetip olamağanımız içün bu meselede faal çalışamız», – dep qayd etti Taşeva «Kelecekniñ forumı» vaqtında, dep bildirdi Ukrinform.
Onıñ qayd etkenine köre, Aqyarnıñ hususiy statusı Rusiyeniñ narrativlerine esaslana edi. «Bu şeerni hususiy statussız qaldıracaqmızdır. Amma aqyarlılarnen laf etsem, çoqusı buña qarşı çıqa. Şunıñ içün munaqaşa devam ete, dep qayd ete», – dep qayd etti memur.
Taşeva, Qırımnıñ statusı – parlament munaqaşasınıñ meselesi ve deñişmeler Ukrayına Yuqarı Radası tarafından qabul etilecek, dep qayd etti.
Ukrayına prezidenti ofisiniñ yolbaşçı muavini Mıhaylo Podolâk Qırım işğalden azat etilgen soñ onıñ muhtariyet statusı alınacaq, dep tahmin etti. Memurnıñ fikirince, unitar bir devlet içinde muhtariyetniñ olması separatistler içün elverişli ola.
Refat Çubarov Podolâknıñ aytqanlarına cevap berip, «Qırım muhtariyetiniñ inkişafsızlığı yarımadada Rusiye bulunuvını quvetleştirgen sebeplerden biri oldı. Anayasada qayd etilgen yarımada muhtariyeti deñişmeli, dep tüşüne Çubarov».
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
