Yarımada işğalinden soñ Rusiye vatandaşlığını alğan Qırım sakinlerine ceza berilmeycek. Bu aqta Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva«RBK-Ukrayına» intervyüsına ayttı.
Onıñ qayd etkenine köre, yarımadada 2014 senesinden soñ yaşayış «toqtamadı».
«Şunıñ içün ilhaq aqqında degil, vaqtınca işğal aqqında aytamız. Yaşayış devam ete. İnsanlar bala doğura, öle, evlene, miras ala ve ilâhre. Ve, ebet, işğalci memuriyetnen bağda bulunalar, amma tek böyle bağ, işğalci vesiqanı aluv içün ceza olmaycaq», – dep ayttı Zelenskıynıñ temsilcisi.
Taşeva, Ukrayına Qırımda 2014 senesinden soñ berilgen Rusiye vesiqalarını tanımay, dep hatırlattı. Faqat Ukrayına akimiyetiniñ fikirince, bazıları diqqatqa alınmalı.
«İlk evelâ tasdıqlanması kerek olğan vesiqalar bar, meselâ, doğuv/olüm şeadetnameleri. İş yapıldı, söz sırası – Yuqarı Radada doğuv, ölüm, evlilik şeadetnamelerini aluvnıñ memuriy protseduralarınıñ kirsetilüvine dair №9069 qanun leyhası qayd etildi ve komitetlerden keçe», – dep bildirdi Taşeva.
Ukrayına prezidentiniñ vekili aytqanına köre, Qırımda işğal vaqtında 1,2 million mahkeme qararı çıqarıldı ve yarımada Ukrayına erkânına qaytqanda olarnı yañıdan baqmağa kerek olacaq.
«Ebet, siyasiy sebepli davalar aqqında aytsaq, Nariman Celâl ve diger siyasiy mabüslerge qarşı, er şey añlaşıla – olarnı azat etemiz. Amma umumcinaiy maddelerge istinaden açılğan davalar ne olacaq? Qatil, zorba, hırsızlar, meselâ. Apishane qapularını açıp, olarnı azatlıqqa yiberip olamaymız. Şunıñ içün bu davalar acele ğayrıdan baqılmalı», – dep qayd etti Ukrayına daimiy vekili.
Taşeva Qırım.Aqiqatqa bergen intervyüsında Qırım işğalden azat etilgen soñ Ukrayına akimiyeti tek «qırımlılarnıñ ayatına tesir etecek» ve teşkerüvden keçecek Rusiye vesiqalarını deñiştirecek, dep ayttı. Böyle vesiqalar Ukrayına vesiqalarına deñiştirilecek. O intervyüda Taşeva pasportlardan ğayrı, Ukrayına insan aqları ya da devletni bozğan aktlarnı qabul etmeycek, dep qayd etti. Bular mal-mülkniñ «devletleştirüvi» ya da mal-malkniñ musadere etilüvinen bağlı.
Ukrayına «işğal altındaki Qırım sakinlerine mecburiy pasport berilüvi» sebebinden Rusiyege qarşı davanı Halqara ceza mahkemesine berdi.
Ukrayına akimiyetiniñ malümatına köre, Rusiyeniñ tam istilâsından evel «mecburiy pasportlaştıruv» Ukrayınanıñ işğal etilgen topraqlarında tahminen 90% ealisine tesir etti.
Ukrayına aq qorçalayıcıları qayd etkenine köre, Rusiye pasportını almağan Ukrayına vatandaşları Qırımdan sıq-sıq quvula.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
