Qırımda Rusiye akimiyeti tarafından uydurılğan qabaatlavlar sebebinden apiste tutulğan bütün siyasiy mabüsler davaları ğayrıdan baqılmayıp azat etilecek. Bu aqta Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva «UP» içün yazğanlarında bildirdi.
Onıñ qayd etkenine köre, işğal vaqtında yarımadada Ukrayına vatandaşlarına qarşı sahte davalar boyunca qanunsız üküm çıqarğan Rusiye mahkemeleri faal çalışa. Ve er bir qararnı ayrı-ayrı baqmağa kerek olacaq – insanlar içün adaletni temin etmek maqsadınen.
«Amma belli bir tertip, nevbet ve müimlik bar. Birinciden, insan aqları bozulğan davalar aqqında aytıla ve taraflardan biri işğalci memuriyet olğan davalar. Bes-belli ki, işğalciler tarafından sahte qabaatlavlar ve işğalci mahkemelerniñ ükümleri sebebinden apiste tutulğan bütün siyasiy mabüslerimiz davaları ğayrıdan baqılmayıp azat etilecek», – dep qoştı Taşeva.
Temsilciniñ fikirince, yarımadada işğal bitken soñ çalışacaq mahkeme organları içün hadimlerniñ yedegi şekillendirilmeli.
Rusiyede ve işğali altındaki topraqlarda Ukrayına tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Taşeva Qırım.Aqiqatqa bergen intervyüsında Qırım işğalden azat etilgen soñ Ukrayına akimiyeti tek «qırımlılarnıñ ayatına tesir etecek» ve teşkerüvden keçecek Rusiye vesiqalarını deñiştirecek, dep ayttı. Böyle vesiqalar Ukrayına vesiqalarına deñiştirilecek. O intervyüda Taşeva pasportlardan ğayrı, Ukrayına insan aqları ya da devletni bozğan aktlarnı qabul etmeycek, dep qayd etti. Bular mal-mülkniñ «devletleştirüvi» ya da mal-malkniñ musadere etilüvinen bağlı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
