Qırımda devamlı hastalıqtan soñ tarihçı, alıp barıcı ve yazıcı Oleksa Gayvoronskiy vefat etti. Bu aqta Crimean Tatars neşiri haber etti.
«Qırımtatar tarihına qoşqan issesi pek büyük. O, Qırım hanlığı ve Altın Ordu dünyasını açtı, yarımadada qalğan yadikârlıqlar aqqında tarif etti. O, Qırım Memleketiniñ tarihını toplap, bilgilerini cümertliknen paylaşqan edi», – dep aytıla haberde.
Gayvoronskiy Bağçasarayda yaşay edi. «Hıdır dede» ilk qırımtatar bala masal filminiñ stsenaristi edi, «Terciman» filmi içün İsmail Gasprinskiy ve «Yigit yolu» filmi içün Bekir Çoban-zadeniñ ayatını tedqiq etken edi.
2011-2014 seneleri Gayvoronskiy ATR telekanalında «Oleksa Gayvoronskiy Qırım kezintileri» yayınınıñ müellifi ve alıp barıcısı edi. Qırım.Aqiqat leyhası içün Qırım hanlığınıñ keçmişi ve Ukrayına ile munasebetleri aqqında yazğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
