Tamila Taşeva Ukrayina prezidentiniñ Qırım MC-deki daimiy temsilcisi vazifesine tayin etildi. Bunıñ aqqında temsilcilikniñ matbuat hızmetinde haber ettiler.
Qayd etilgeni kibi, Taşeva temsilcilikniñ taqımında ve Qırım platforması ofisinde 2019 senesinden berli çalışa.
"Şunıñ içün, muvafıq tayin planlaştırılğan ve bütün evelki institutsional neticelerniñ ve olarnıñ mantıqlı ve uyğun inkişafına yönetilgen", - dep haber ettiler temsilcilikte.
Taşeva 1985 senesi Özbekistannıñ Samarqand şeerinde sürgün etilgen qırımtatarlarnıñ qorantasında doğdı. Qorantası tek 1991 senesi vatanı Qırımğa qaytıp oldı. Aliy tasilni Aqmescitte Vernadskiy adına Tavriya milliy universitetinde aldı.
"Qırım işğal etilmezden evel bir sıra medeniy ve maarif leyhalar ve içtimaiy teşebbüsler ömürge keçire edi, Ukrayinada qırımtatar medeniyetini ilerilete edi, festivaller ve tedbirler teşkil ete edi, Ukrayina vatandaş cemiyetiniñ ömründe ve onıñ inkişafında faal iştirak ete edi. 2014 senesi fevral ayında "QırımSOS" cemaat teşkilâtınıñ tesisçilerinden biri ve uzun müddetli reberi oldı", - dep aytıp berdiler temsilcilikte.
2019 senesinden başlap Taşeva Ukrayina prezidentiniñ Qırım MC-deki daimiy temsilcisiniñ muavini vazifesinde bulundı. O, işğal etilgen yarımadanıñ sakinlerine ve mecburiye köçkenlerge yardım meseleleri ve taliliy ve malümat saaları ile ögraşa edi.
"O, Qırım MC ve Aqyar şeeriniñ İşğalden azat etilmesi ve reintegratsiya strategiyasınıñ azırlanılmasında, bir sıra qanunlarnıñ, şu cümleden tamır halqlarnıñ statusı ve digeleriniñ azırlanılmasında, qırımtatar tiliniñ inkişaf kontseptsiyasınıñ ve Qırım platformasınıñ tesis sammitiniñ teşkil etilmesinde iştirak etti", - dep yazıla bildirmede.
Evel Ukrayina prezidentiniñ Qırım MC-deki daimiy temsilcisi vazifesinde Anton Körineviç edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
