Ukrayına prezidentiniñ Qırım Muhtar Cumhuriyetindeki vekili Tamila Taşeva yanvarniñ 20-nde Qırım Muhtar Cumhuriyeti kününi qayd etmemege çağırıp, müessise Qırım Muhtar Cumhuriyetiniñ Yuqarı Radasınıñ bu künni Qırım Muhtar Cumhuriyeti künü olaraq belgilemek qararını lâğu etmek içün yol qıdıra, dep bildirdi.
Taşeva yazğanına köre, 1991 senesi yanvarniñ 20-nde Qırım muhtariyetiniñ yañıdan quruluvınen bağlı referendum Moskvadaki kommunistlerniñ merkeziy komiteti tarafından «Qırımğa evge qaytqan qırımtatarlarnıñ ileride bir aqqı olmasın dep» yapıldı. Bu qarar ileride Rusiye Qara deñiz flotunı da Qırımda qaldırmaq içün alındı».
«Bugün bu «künni» işğalciler yapqan propagandasında faal sürette qullana. Onı qolay-qolay işğalnen ve «2014 senesi yapılğan qanunsız referendumnen» bağlay ve «Qırımnıñ Rusiyege qoşuluvında ilk adım» 1991 senesi yanvarniñ 20-nde aytıldı, dep qayd eteler. İşğalci memuriyetler işğal etilgen Qırımda olmaycaq tedbirler keçire», – dep yazdı Taşeva Facebook saifesinde.
O, «bu künni unutıp, mahsus levha çıqarmamağa, tebriklememege çağırdı. Yanvarniñ 20-nde daa müim bir şey bar – Donetsk ava limanı imayecileriniñ hatıra künü».
Qırımda yanvarniñ 20-nde Qırım muhtariyetiniñ yañıdan quruluvınen bağlı referendum yılı qayd etile. Yarımada işğalinden evel bu kün Qırım Muhtar Cumhuriyeti Künü olaraq qayd etilgen edi.
Qırım Rusiye tarafından işğal etilgen soñ 2014 senesiniñ başında bu kün yarımadada bayram dep ilân etildi ve «Qırım Cumhuriyeti Künü» dep adlandırıldı.
1991 senesi yanvarniñ 20-nde Qırım Muhtar Sovet Sotsialistik Cumhuriyetiniñ yañıdan yaratıluvı aqqında umumqırım referendumında Qırım sakinleriniñ 93,26%-ı qol tutıp rey berdi. O vaqıt yarımadada yaşağan qırımtatarlarnıñ ekseriyeti qırımtatar halqınıñ milliy lideri, hususan Mustafa Cemilevniñ çağıruvlarına emiyet berip, referendumnı boykot etken edi.
Rey berüvge çıqarılğan sual böyle edi: «Qırım Muhtar Sovet Sotsialistik Cumhuriyetiniñ Sovet Sotsialistik Cumhuriyetler Birliginiñ subyekti ve İttifaq añlaşmasınıñ iştirakçisi olaraq yañıdan quruluvına qol tutasıñızmı?».
1991 senesi fevralniñ 12-nde umumqırım referendumınıñ neticeleri esasında Ukraina Yuqarı Radası «Qırım Muhtar Sovet Sotsialistik Cumhuriyetiniñ ğayrıdan tiklenüv» qanunını qabul etip, dört aydan soñ 1978 senesi Ukraina Sovet Sotsialistik Cumhuriyetiniñ Anayasasına deñişmeler kirsetti.
1991 senesi sentâbrniñ 4-nde Qırım parlamentiniñ fevqulâde sessiyası cumhuriyetniñ devlet suvereniteti şartnamesini qabul etti. Anda Ukraina terkibinde uquqiy demokratik devletni qurmaq ğayreti aqqında aytıldı.
1991 senesi dekabrniñ 1-nde Ukraina referendumında Qırım sakinleri Ukraina mustaqilligi aqqında rey berüvde iştirak etti. Qırımlılarnıñ 54 fayızı Ukraina mustaqilligi içün rey berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
