Ukrayina halq deputatı, qırımlı Tamila Taşeva Avropa Şurası Parlament assambleyasında (PACE) Ukrayina Yuqarı Radası Daimiy eyyetiniñ azası oldı. Bu aqta o, Facebook saifesinde bildirip, bu tayin Ukrayinanı esas halqara meydançıqta muntazam sürette temsil etmege imkân bere, dep qayd etti.
Taşevanıñ aytqanına köre, PACE işi çerçivesinde o, tamır halqlarnıñ aqlarını qoruv, vaqtınca işğal etilgen topraqlarnıñ meseleleri ve qaçaq ve memleket içinde köçip kelgenlerniñ aqlarına diqqat ayırmağa planlaştıra. O, Köç, halqara imaye ve iqtisadiy işbiriligi komitetinde çalışacaq.
"Avropa Şurası Parlament assambleyasında Ukrayina Yuqarı Radası Daimiy eyyetiniñ erkânına resmiy şekilde qoşuldım. Menim içün büyük mesüliyet ve aynı vaqıtta Ukrayinanı esas Avropa halqara meydançıqlarından birinde muntazam sürette temsil etmek imkânı ola", – dep yazdı o.
Qırımtatar halqınıñ lideri Mustafa Cemilev QIRIM.News neşirine izaat berip, bu tayinge yüksek qıymet kesti ve Taşevanıñ Qırım meselelerinde teren bilgileri bar, dep qayd etti.
"Qırımtatar halqı içün Avropa Şurası Parlament assambleyasında vekiliniñ olması pek müim. Qırımtatar halqı içün berilgen kvota – pek qıymetli. Tamila Taşeva Qırımdaki vaziyetni yahşı bile, çünki Prezidentniñ Qırım Muhtar Cumhuriyetindeki temsilcisi edi. Qırımnen bağlı bir mesele çıqsa, Tamilanıñ sesi müim olacaq", – dep qayd etti Cemilev.
Tamila Taşeva – aq qorçalayıcı, "KrımSOS" teşebbüsiniñ qurucılarından biri. 2022 senesinden 2024 senesine qadar Ukrayina Prezidentiniñ Qırım Muhtar Cumhuriyetindeki temsilcisi edi, soñra "Ğolos" fraktsiyası erkânında parlamentte çalışıp başladı.