Kremlniñ eski siyasiy mabüsi, qırımlı Volodımır Baluhnıñ alı stabil, amma «tam esi daa yoq». Bu aqta «Avropa birdemligi» Ukraina halq deputatı İrına Ğeraşçenko Facebookta haber etti.
«Üç aftadan berli Volodâ Baluh cinaiy ücümden soñ hastahanede buluna. Baqqan ekimlerinden haberler: «Hasta stabil, alı fenalaşmay. Tam esi daa yoq. Yavaş-yavaş nefes almasına azırlaymız». Volodâ şimdi saylavlarnen Faal oğraşacaq ve Kyiv vilâyet şurasına «Avropa birdemligi» taqımınıñ birincisi olacaq edi. Pek zor», – dep yazdı Ğeraşçenko.
Baluh köteklengenini Oleg Sentsov haber etti. Onıñ malümatına köre, faal sentâbrniñ 7-nden 8-ne keçer gecesi köteklendi. Ağır alda hastahanege alındı – qolu ve köpürçik kemigi sındırıldı.
Kiyv politsiyasınıñ malümatına köre, qırımlı 10-15 kişinen «Gidroparktaki» qavelerden birinde raatlanğan edi. Soñki sefer onı yarı gecede körgenler. Uquq qoruyıcılar Ukraina Ceza kodeksiniñ 187-inci maddesiniñ 4-ünci qısmına istinaden (aydutlıq) cinaiy tahqiqat başlattı.
Ukraina prezidentiniñ ofisi qırımlığa yapılğan ücüm sebebinden qasevetlengenini bildirdi.
Cumaertesi künü, sentâbrniñ 19-nda, N4 Kyiv prokuraturasınıñ prokurorınıñ muracaatı esasında paytahtnıñ Dnepr rayon mahkemesi Baluhqa ağır yara ketirgeninden şübheli sayılğan kişini eki ayğa apiske aldı.
