Estoniyada Ukraina elçisi Maryana Betsa, “Qırım Rusiye ile birlşkeni” aqqında yazğan “Sputnik Estoniya” Rusiye haber agentliginiñ muarririyetiniñ yazısına cevaplandı.
“Men “Sputnik Estoniya”ğa hatırlatam ki, Rusiye, halqara qanunlarnı bozıp, ukrain Qırımnı qanunsız işğal etti. Rusiye tarafından tecavuz yüzberdi ve halqara cemiyetçilik oña qarşı cezalarnı - sanktsiyalarnı ilân etti. Qırım işğalten qorçalanacaq”, - yazdı elçi.
Martnıñ 23-ünde “Sputnik Estoniya” Rusiye haber agentliginiñ Twitterinde “martnıñ 18-inde Qırım Rusiye ile birleşkenine beş yıl oldı ve ğarbiy memleketler kene seskendi” yazısı peyda oldı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
