2023 senesi Qırımda Rusiye arbiy obyektlerine eñ azından 184 ücüm yapıldı. Muvafıq malümat bazasını "Qara deñiz strategik tedqiqatları institutı" ve BlackSeaNews neşriyatınıñ monitoring gruppası azırladı.
Keçken sene Qırımda er kün orta esapnen ücümler yapılğanı qayd etile.
Hususan, Aqyarda eñ azından 45 ücüm qayd etildi, Qara deñizde Rusiye gemilerine eñ azından 23, yarımadanıñ ğarbında eñ azından 33, Canköy rayonında eñ azından 21, Kefe regionında eñ azından 15 ücüm qayd etildi ve Keriç köpründe 2023 senesi eñ azından dört ücüm yapıldı.
Sentâbr ayında yarımadada eñ çoq patlav oldı - 31 ücüm, 30 ücüm avgustta, 21 ücüm iyülde, iyün ve oktâbr aylarında 18 ücüm oldı.
Daa evel Qırım.Aqiqat leyhasınıñ jurnalistleri Qırım yarımadasınıñ interaktiv haritasını derc etken edi, onda 223 Rusiye Federatsiyasınıñ arbiy obyektleri yerleşken.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
