Aqyarda keçirilgen kontsertte «Aqyar» qırımtatar halq ansambli «Okean Elzı» ukrain taqımınıñ «Taka, yak tı» yırına oyun töşedi. Bu aqta Qırım.Aqiqat mühbiri bildire.
Kontsert Aqyarnıñ medeniyet ve sanat merkezinde keçirildi.
«Aqyar» ansambli büyükler gruppasınıñ «Okean Elzı» taqımınıñ lideri, ukrain yırcısı Svâtoslav Vakarçuknıñ yırına azırlağan zemaneviy oyunları salonda elçırpmalarnen qarşılandı.
«Aqyar» ansambli bir qaç qırımtatar oyunı, «Kadril moya» rus oyunı, «Hava nagila» yeudiy oyunı, moldav, acar, gürci, özbek ve diger oyunlarnı töşeji.
Oyuncılar tahminen yigirmi oyun töşedi, gençlerniñ er bir oyunı ayrı qıyafette oldı.
Kreml kontrolindeki Aqyarnıñ Rusiye ükümeti medeniyet idaresiniñ yolbaşçısı Nikolay Krasnolitskiy seyirci ve oyuncılar ögünde sözge çıqıp, ansamblge yardım etecegini vade etti.
«Aqyar» horeografik ansambli 2002 senesi çalışıp başladı. 2010 senesi ansambl reberi horeograf Susanna Osmanova oldı. Ansambl bir çoq yarış ve festivallerde ğalebe qazana.
