Qırımdaki Rusiye FSBsi tahqiqatı Bağçasaraydaki ekinci «Hizb ut-Tahrir davasınıñ» mabüslerine körüşüvlerge ruhset bermey, böylece mabüslerge ve tuvğanlarına basqı yapmağa tırışa, dep bildirdi qırımlı adliyeci Elvina Semedlâyeva Qırım.Aqiqatqa.
«Körüşüv içün izin aluv sisteması böyle: soylardan biri tahqiqatçı adına ariza berip, mabüsnen körüşmege izin berilmesini rica ete. Bizim vaziyetimizde tahqiqatçı körüşüvlerni muntazam sürette red ete. Amma, qanunğa köre, SİZOda mabüslernen ayda eki kere körüşmege izin berile. Tuvğanları mahkeme oturışuvları vaqtında da körüşip olamay, çünki mahkemeler qapalı şekilde keçirile», – dep ayttı adliyeci.
Semedlâyevanıñ aytqanına köre, mabüslerniñ ömür arqadaşları körüşüvlerge izin berilmegenine mahkeme üzerinden itiraz bildirecek ola.
«Soñki böyle olğan şey – apiske alınğan «Qırım birdemliginiñ» koordinatorı Server Mustafayevniñ apayı Mayye Mustafayevanıñ davası. Körüşüvni red etüv şikâyet arizasında tek onıñ degil, Server, ana-babası ve balalarınıñ menfaatları bozula, dep qayd etken edi. Vaziyetni añlamaq içün: keçken sene mayıs ayında Server tutulğan soñ onıñ ömür arqadaşına bir kere bile körüşmege izin berilmedi. Bu davanıñ diger tuvğanları da aynı vaziyette, misal olaraq, Memet Belâlov ya da Marlen Asanovnıñ ömür arqadaşları», – dep qayd etti adliyeci.
Semedlâyevanıñ qayd etkenine köre, Rusiye FSBsi tahqiqatı körüşüvlerge izin bermeyip, bunı mabüs ve tuvğanlarına basqı usulı olaraq qullana.
«İlk evelâ – qabaatlayıcı tarafnıñ mabüs ve tuvğanlarına yapqan maneviy basqısı. Mabüsler izolâtsiyada buluna. Bundan ğayrı, tahqiqatçı körüşüvlerge izin berilmesi içün tuvğanlarına kerekli malümat bermege teklif etken edi. Tahqiqatçı – qabaatını tanımağa ya da er angi işbirligine razı olmağa – mabüslerge de teklif ete», – dep tarif etti adliyeci.
2017 senesi oktâbrniñ 12-nde Rusiye telükesizlik hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
