Aprelniñ 10-na qadar Qırım Muhtar Cumhuriyeti ve Aqyarda qayd olğan 1975 Ukraina vatandaşı Ukraina prezidenti saylavlarınıñ ekinci turında rey berüv yerini deñiştirdi. Bu aqta Ukraina saylayıcıları devlet siciliniñ saytında haber etile.
Berilgen malümatqa köre, 1558 qırımlı ve 417 aqyarlı saylavlarda rey bermek aqqından faydalanmağa niyetlene.
Eñ çoq qırımlı ve aqyarlı (496 ve 110 insan) Kyivde rey berecek ola. Kyiv vilâyetinde 199 qırımlı ve 51 aqyarlı, Herson vilâyetinde 107 qırımlı ve 15 aqyarlı rey berecektir.
Qırım.Aqiqatnıñ daa evel bildirgenine köre, Qırım Muhtar Cumhuriyeti ve Aqyarda qayd olğan 5528 Ukraina vatandaşı birinci tur vaqtında rey berüv yerini deñiştirgen edi. Olardan 4419 qırımlı ve 1109 aqyarlı ola.
Ukraina prezidenti saylavlarınıñ ekinci turı aprelniñ 21-nde olacaq. Qırımlılar esas Ukrainada rey bere bile.
