Rusiye ile viza rejimi başlağandan berli 80-ge yaqın rusiyeli Ukrayina vizasını almaq içün ariza berdi. Bunı umummilliy televizion maratonnıñ yaynında Ukrayina devlet sıñır hızmetiniñ spikeri Andriy Demçenko bildirdi.
"Bu ay içinde maña malüm olğanı kibi, 80-ge yaqın Rusiye vatandaşı viza almaq içün ariza bergen. Amma iç birine şimdilik viza berilmegen ve viza olmağanı içün de sıñırdan kimse keçemegen", - dedi o.
Demçenkonıñ sözlerine köre, Ukrayinağa kirmegme istegen rusiyelilerniñ episi TİN ve Devlet sıñır hızmeti tarafından teşkerile.
İyülniñ 1-nden Ukrayinada Rusiye vatandaşları içün viza rejimi tayin etildi.
Mayısnıñ 25-nde Zelenskıy Ukrayinağa kelgen Rusiye vatandaşları içün viza rejiminiñ tayin etilmesiniñ kerekligi ile bağlı petitsiyağa qoltuttı. O, Ukrayina baş naziri Denis Şmıgalge "bu meseleniñ üzerinde çalışmağa" buyurdı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
