Tacikistan Tış işler naziri Sirociddin Mühriddin Rusiyede «Krokus Siti Holl» kontsert salonına ücüm yapqanında şübheli olğanlarğa qarşı yapılğan işkencelerni takbih etti. Bu aqta Azatlıq Radiosınıñ Tacik hızmeti haber ete.
Rusiyedeki uquq qoruyıcı organları halqara uquq normalarına ve qanun talaplarına riayet etmeli, yaqalanğanlarğa qarşı işkenceler yasaq etile, dep bildirdi memur aprelniñ 12-nde Minskte Mustaqil devletler birligi memleketleriniñ Tış işler nazirleri şurasınıñ toplaşuvında.
«Açıq informatsion alanda terror ücüminiñ tahmin etilgen icracılarını yaqalap işkencege oğratqanını köstergen levhalarnı aydınlatmaq qabul etilmegen bir şey. Bu şekilde alınğan itiraflarnıñ qıymeti er keske belli», – dedi o.
Mühriddin Rusiyede «Krokusqa» ücümden soñ ksenofobiya artqanını takbih etip, «tüşünilmegen informatsion kampaniyası» neticesinde «Tacikistan vatandaşları ve taciklerge qarşı menfiy munasebet» şekillene, dep bildirdi. Rusiye memurları Tacikistan naziriniñ aytqanlarına cevap bermedi. Mühriddin Minskte Rusiye Tış işler naziri Sergey Lavrovnen körüşti. Nazirliklerniñ körüşüv esabatlarında bu mevzular yoq.
«Krokusqa» cuma künü, martnıñ 22-nde, ücüm etildi. Onıñ qurbanı eñ az 144 insan oldı, dep bildirdi Rusiye akimiyeti. «İslâm devleti» gruppirovkası ücümge alâqası bar, dep bildirdi.
Basmannıy mahkemesi davada qabaatlanğanlarnı martnıñ 24-ne keçer gecesi apiske aldı. Apiske alınğanlarnıñ çoqusı – Tacikistan vatandaşı. İlk dört kişi mahkemege işkence ve kötek izlerinen ketirildi. Saidakrami Raçabalizodeniñ qulağı kesildi. Muhammadsobir Fayzov mahkemege köpçekli teskerede siydik torbasınen ketirildi. Şamsidin Fariduni elektrik aqımnen işkence etildi. Dalercon Mirzoyev mahkemege boynunda paket parçalarınen ketirildi.
Rusiye memurları, şu cümleden Rusiye prezidentiniñ matbuat kâtibi Dmitriy Peskov bunı izaatlamadılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
