Ukrayina prezidentiniñ Qırım Muhtar Cumhuriyetiniñ sabıq temsilcisi Tamıla Taşevanıñ Yuqarı Radağa halq deputatı olaraq keçüvi parlamentte Qırım kün tertibini quvetleştirecek ve qırımtatar halqı içün müim meselelerniñ çezilüvini tezleştirmege yardım etecek. Böyle fikirni Qırım.Aqiqatqa Qırımtatar Milliy Meclisi reisiniñ muavini İlmi Ümerov bildirdi .
Onıñ aytqanına köre, Taşevanıñ Qırım kün tertibine şahsiy diqqatı, tecribesi ve ihtisaslılığı oña parlamentte Qırım meseleleriniñ çezilüvinde semereli bir yolbaşçı olmağa yardım etecek.
"Ukrayina halq deputatı — memleketniñ eñ yüksek vazifelerinden biridir. Elbette, halq deputatı vekâletlerini doğru qullansa, Qırım meselesiniñ çezilüvinde çoq fayda ketire bile. Onıñ tecribesi, yaratıcılığı ve becerikleri yeterlidir. O, Qırım ve qırımtatarlarnıñ problemlerini yahşı bile. Bizim içün eñ büyük mesele — Qırımda qırımtatar muhtariyetiniñ olmaması, bu mesele çoqtan çezilmey. Amma qayd etem ki, Ukrayinada bu mevzuda qonuşmaq istegenler çoq, amma bu qararnıñ müimligini añlağanlar az. Yañı zenaatdaşları arasında Taşeva maarifçi olmaq kerek olacaq. Amma o bunı da bile. Daa bir müim mesele — Meclisni qırımtatar halqınıñ temsiliy organı olaraq resmiy ve uquqiy şekilde tanımaq! Bütün bu meselelerni işğalden azat etilgen soñ degil de, şimdi çezmek kerek", — dep ayttı Meclis reisiniñ muavini.
Ümerov, Qırımnıñ işğalden qurtaruv strategiyası meselesinde memleket yolbaşçılığınıñ ritorikasınıñ deñişmesi sebebinden Qırım kün tertibini yañıdan aktualleştirilmek kerek, dep qayd etti.
Ukrayina prezidenti Volodımır Zelenskıy bildirdi ki, al-azırda Qırımnı arbiy yolnen işğalden boşatmaq "quvet yetmegeni içün imkânsızdır", şunıñ içün Ukrayinanıñ mevamı quvetleşken taqdirde "diplomatik yollarnı qıdırmaq" kerek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
