Rusiye ordusını "itibardan tüşürüv" içün Qırımnıñ Ukrayina tarafdarı faalleri 15 million rubleden ziyade para cezasını aldılar. Bu aqta Ukrayina prezidentiniñ QMC-deki daimiy temsilcisi Tamila Taşeva 2022-2023 seneleri idaresiniñ faaliyet neticelerine bağışlanğan matbuat konferentsiyası vaqtında bildirdi.
"Qırım - büyük arbiy baza, anda FSB ve uquq qoruyıcı organları çoq, şunıñ içün bu kiçik numayışlar. Bu nasıl körüne: bu Ukrayina bayrağınıñ köterilmesi, Bogdan Ziza yapqan kibi, işğalci memuriyetke sarı-mavı boya tökülmesi, cenkke qarşı varaqalar tarqatqan Saşa Tarapon, "Bayraktar" yırını diñleyicilerge qoyğan Andrey Belozerov, - dep tarif etti Taşeva.
Onıñ aytqanına köre, al-azırda Qırımda 191 insan siyasiy sebeplerden azatlıqtan marum etildi, 123-ü qırımtatardır. Olarnı "terrorizm", "ekstremizm" ve "diverssiya" ile qabaatlaylar.
2015 senesi Rusiye mahkemesi rejissör Oleg Sentsovnı teraktlarnıñ teşkil etilmesinde qabaatlap, 20 yılğa mahküm etti. Rusiye quvetçileri "diversiya"nı ''Hizb ut-Tahrir'' islâm siyasiy teşkilâtınıñ vekillerine de yükley. Rusiyeniñ Ukrayinağa büyük cenki başlağan soñ yarımadada cenk ile razı olmağanlarnıñ episi kütleviy surette taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
