İşğal etilgen Qırımda 218 siyasiy mabüs bar, olardan 133 qırımtatardır, dep bildirdi Ukrayina prezidentiniñ Qırım Muhtar Cumhuriyetindeki daimiy temsilcisi Tamila Taşeva.
"218 siyasiy mabüsimiz bar, olardan 133 qırımtatardır, yani 60% ziyade. Kerçekten de, olarnı yarımadadan qanunsız çıqarıp, Rusiye Federatsiyasında mahkeme eteler. Asılında vatandaşlarımıznı azat etmek imkân yoq, vatandaş reineleri yoq", — dep qayd etti Taşeva ukrayin milliy tele marafonı efirinde.
O, Rusiye SSCB ükümetiniñ cinayetlerini tekrarlap, sürgünlik cinayetini yapqanına diqqat çekti.
"Rusiye ya da Sovetler Birliginiñ mesüliyetke çekilmegen sürgünlik cinayeti, kerçekten de, qaytıp kele. Ve biz bunı tam miqyaslı istilâdan soñ faal surette köremiz, anda olar sürgünlik cinayetini, hususan balalarnı, vatandaş ealisini tek Qırım yarımadasında degil de, diger vaqtınca işğal etilgen topraqlarda da tarqatalar", — dep qoştı memur.
Daa evel Taşeva haber etkenine köre, 2023 senesi Rusiye Federatsiyasında ve Ukrayinanıñ işğal etilgen topraqlarında ordunı itibardan tüşürgen er altıncı ceza Qırımda qayd etildi. Açıq davalarnıñ sayısı 70,6% arttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
