Cemilevniñ aytqanına köre, Abramoviç muzakereler bitken soñ Ukrayinanıñ şimdiki mudafaa naziri Rustem Ümerovdan Cemilev ile körüşmekni rica etken.
"Hilton"da biz onıñnen ayrı körüşip, laf ettik. Men oña cenk, elbette, insanlarnı öldürgenini ayttım. Amma men sizlerni — ruslarnı bir şey içün affu etmem: bugünge qadar 446 bala öldürildi. Balalarnı közüne doğru atqan fotolar bar. Men bunı iç bir vaqıt unutmam. Bu bir şey. Ve ekinciden, sanki halq qabaatlı degil, akimiyet qabaatlıdır. Men aytayım: episiñiz qabaatsızsıñız. Çünki siz, susıp, Putinge qoltutqanıñız sayesinde bu cinayetke yardım etesiñiz. Ve o maña meraqlı bir şey ayttı. O dey ki: "Bilsiñizmi, faşist Almaniyasında da aynı vaziyet edi. Amma onlarnen yıl keçti, ve Almaniya demokratiya nümünelerinden biri oldı. Ve bu, Almaniyada belli bir müddet devamında tış ükümet olğanı sebebinden oldı. Ve Rusiyede tış ükümet olmağanına qadar, bu putinizm, rus faşizmi er vaqıt canlanacaq", —dep hatırlay Cemilev.
Qırımtatarlarnıñ lideri, Abramoviçke böyle bir fikirni Rusiye prezidenti Vladimir Putinge bildiremi yıqmı, dep sorağan. O da: "Siz ne aytasıñız? Meni asarlar", dep cevap bergen. Amma onıñ tış idaresi kerek olğanını aytqanı bu memleket içün yahşı bir ilâc olur edi", — dep qayd etti Ukrayina halq deputatı.
Bundan da ğayrı, Qırım.Aqiqatqa bergen intervyusında Mustafa Cemilev 2022 senesi baarde Ukrayina ve Rusiyeniñ Qırım statusı aqqında muzakereleriniñ tafsilâtlarını aydınlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
