Gagauz asıllı ukrainalı yırcı Natalya Papazoğlu dekabrniñ 20-nde İstanbulda koronavirus pandemiyası sebebinden online ötkerilgen «Türkvizyon» yır yarışında ğalip çıqtı, dep haber ete Azatlıq Radiosı.
«Türk dünyasında prestijli olğan Türkvizyon 2020 yır yarışında ğalebe qazanğan gagauz asıllı ukrainalı Natali Papazoğlunı can-yürekten tebrikleyim», – dep yazdı Ukraina Tış işler naziri Dmıtro Kuleba Twitter saifesinde.
«Eurovision» örnekli bu yarışta türk halqlarınıñ vekilleri ya da türk tilli icracılar iştirak ete, Papazoğlu gagauz tilinde aytqan «Tikenli yol» yırınen 26 iştirakçi arasında birinci oldı.
Prikarpatyedeki Kaluş şeerinde dünyağa kelgen Natalya Papazoğlu 2016 senesi de bu yarışta gagauz tilinde başqa yır aytacaq edi ve ukrain saylavından keçti, amma yarış olmadı – şimdiki yarışqa qadar bir qaç yıl devamında da ötkerilmedi.
«X-Faktor»-2015 ukrain yarışında Natalya Papazoğlu yarım finalğa çıqqan edi.
Şimdiki yarıştan evel «Türkvizyon» üç kere keçirilgen edi – 2013, 2014 ve 2015 seneleri. 2013 senesi olğan ilk yarışta Ukrainadan qırımlı Fazile İbraimova iştirak etip, üçünci yer qazanğan edi.
