Türkiyeniñ ğarbiy yalısındaki Bodrum şeeriniñ rayonında Ege deñizinde iyünniñ 17-nde qayıq avdarılıp battı, dep haber ete Azatlıq Radiosı.
Qaza neticesinde 12 insan elâk oldı (cesedleri 32 metr terenlikte tapıldı). 31 insan qurtarıldı. Bu aqta Deutsche Welle Türkiye yalı qaravulınıñ malümatına esaslanıp bildire.
Bu malümatqa köre, qayıq Yunanistanğa baracaq olğan migrantlarnı taşığan edi. Qaza sebepleri, qayıqta olğan migrantlarnıñ vatandaşlığı şimdilik belli degil.
Türkiye yalı qaravulı eki gemisiniñ ekipajları migrantlarğa yardım etmege keldi. Vertolöt ve dalıcılar taqımı qoşuldı.
Dört yıl evelsi Türkiye Yaqın Şarq ve Afrikadan Ğarbiy Avropağa baracaq olğan migrantlar içün esas aqtarma yerlerinden biri oldı. 2016 senesi Ankara ve Avropa Birligi arasında tizilgen añlaşma neticesinde qaçaqlarnıñ sayısı eksildi, amma az olsa da, bar edi.
