Türkiye Cumhuriyetiniñ Ukraina elçisi Yağmur Ahmet Güldere memleketiniñ Qırım ilhaqını tanımama meselesinde siyaseti deñişmedi, dep işandırdı.
Bu aqta o, Rusiye Devlet dumasınıñ işğal etilgen Qırım deputatlarınıñ Türkiyege kelgenini izaatlap, resmiy Twitter saifesinde yazdı.
«Qırım siyasetimiz deñişmedi, bizler Ukraina topraq bütünligine qoltutamız», – dep aytıla elçiniñ haberinde.
Rusiye deputatları, hususan Natalya Poklonskaya ve Ruslan Balbek, cumaertesi künü, oktâbrniñ 12-nde, İstanbulğa keldi. Olar terrorizm ile küreş ve regional işbirligini pekitüv meseleleri boyunca parlament spikerleriniñ konferentsiyasında iştirak etti.
Poklonskaya, Türkiye prezidenti Recep Tayyip Erdoğan ile qol tutuşqanını Facebookta kösterdi.
Bundan soñ Qırımtatar Milliy Meclisiniñ reisi Refat Çubarov ve Dünya qırımtatar kongressi Poklonskaya ve Balbekniñ Türkiye ziyaretini takbih etti.
Qırımtatarlarnıñ milliy lideri Mustafa Cemilevniñ fikirince, Erdoğannıñ Poklonskaya ve Balbekniñ kim olğanından «haberi yoq edi».
Ukraina Tış işler nazirligi, işğal etilgen Qırımda saylanğan Rusiye Devlet dumasınıñ deputatları Poklonskaya ve Balbekniñ prezident Erdoğan ile körüşkeninden sebep Türkiyege narazılıq notasını yolladı. Türkiye elçisi çağırıldı. Poklonskaya, Ukraina tarafınıñ cevabı «uyğunsız ve külünçli» oldı, dep ayttı.
Daa evel Ankara Qırımdan saylanğan deputatlarnen resmiy seviyede iş tutmağan edi.
Türkiye, dünya memleketleriniñ ekseriyeti kibi, Qırım ilhaqını tanımay.
