Türkiyeniñ Yuqarı memuriy mahkemesi, İstanbuldaki Ayasofya müzeyi cami olıp olamaycaqmı baqmalı. «Anadolu» agentliginiñ malümatına köre, qarar iyülniñ 2-nde ya da 15 kün içinde alına bile, dep haber ete Azatlıq Radiosı.
Kilse 532-537 yıllarında Bizans imperatorı I Yustiniannıñ fermanınen quruldı. Ayasofya aman-aman biñ yıl devamında Hristian aleminiñ eñ büyük kilsesi edi.
1204-1261 yıllarında yunan ortodoks kilsesi roma-katolik kilsesi oldı. Bu Latin imperatorlığı vaqtında kerçekleşti.
1453 senesi, Osmanlı imperatorlığı Konstantinopolni zapt etken soñ, kilse cami oldı. Binağa dört minare qoşuldı. 1934 senesi Ayasofya müzey oldı. Al-azırda müzey UNESCO dünya mirası cedveline kire.
Bina statusını deñiştirip, cami yapmaq teklifi Türkiye prezidenti Recep Tayyip Erdoğanğa aittir.
Muhalifet firqalarınıñ fikirince, Türkiye prezidenti vatandaşlarnıñ diqqatını iqtisadiy buhrandan ve koronavirus pandemiyasından çekmege tırışa.
Ayasofya müzeyini er yıl millionlarnen turist ziyaret ete. İstanbul akimiyetiniñ malümatına köre, 2019 senesi müzey 3,7 million turist tarafından ziyaret etildi.
