Türkiye ve Suriyede zelzeleden elâk olğanlarnıñ sayısı 41 biñden çoq oldı. Bunı Anadolu ve Reuters haber ete.
Türkiye prezidenti Recep Tayyip Erdoğan memlekette tabiat afetiniñ qurbanları 35 418 kişi oldı dep bildirdi. Hastahanelerde de 13 208 biñ adam bulunğanını qayd etti. Reuters agentligi Suriye devlet haber vastaları ve BMT agentliginden kelgen malümatqa esaslanıp memlekette 5800 insan ölgenini tahmin ete.
Türkiye devlet başı martnıñ başına yaqın yıqılğanlarnıñ yerine 30 biñ ev quruluvı planlaştırılğanını bildirdi
Anadolu yazğanı kibi qıdıruv ve qurtaruv işleri vaqtında dağıntılar altında 200 saattan ziyade keçirgen eñ az dört adam qurtarılğan.
Böylece Adınaman şeerinde qurtarıcılar dağıntılar astından 12 yaşındaki Beratnı çıqarğanlar. O parçalar tübünde 207 saat keçirgen. Oğlançıqnıñ qorantasını ise daa tapıp olmağanlar.
Kahramanmaraşta tabiat afetinden 205 saat keçken soñ 35 yaşındaki qadınnı qurtarıp olğanlar. Neşirniñ malümatına köre, onıñ bulunğan yerine yetmek içün qurtarıcılar 5 metrlik tunnel çekmek kerek olğanlar.
Türkiyeniñ cenüp-şarqındaki zelzelelerniñ aqibetleri: biñlernen ölü, biñlernen insan dağıntılar altında qala (fotoresimler)
Türkiyeniñ cenüp şarqında ve qomşu Suriyede fevralniñ 6-na keçken gecesi 7,8 büyükliginde zelzele yüz berdi. Zelzeleniñ merkezi Türkiyeniñ Gaziantep şeeriniñ şimalinde, Suriye sıñırına tahminen 90 km uzaqlıqta edi. Yerastı sarsıntıları bir qaç Türkiyeniñ bölgesi Adana, Ankara, Antalya, Gaziantep, Kayseri, Mersin, Trabzon, Urfada ve Suriye, Lübnan, İraq, Mısır, Yunanistan, Qıbrız, Gürcistan, Eremenistan ve İsrailde duyuldı,
Türkiye prezidenti Recep Tayyip Erdoğannıñ sözlerine köre, zelzele 1939 Erzincan zelzelesinden bugünge qadar Türkiye tarihınıñ eñ büyük felâketidir.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.