Suriyeniñ İdlib vilâyetindeki arbiy zıddiyet kerginleşken soñ Türkiye ve Avropa Birliginiñ sıñırından eñ az 18 biñ qaçaq keçti. Bu aqta Reuters Türkiye prezidenti Recep Tayyip Erdoğannıñ malümatına esaslanıp bildire.
Cumaertesine keçer gecesi, fevralniñ 29-nda, Yunanistan politsiyası Türkiye sıñırından Suriye migrantlarınıñ gruppalarına qarşı köz yaşlatıcı gaz qullandı. Şaatlarnıñ aytqanına köre, qaçaqlar Yunanistanğa kirmege tırışıp, politsiya hadimlerine taş attı.
Türkiye prezidentiniñ aytqanına köre, Ankara million qaçaq içün memleketniñ cenübinde telükesiz alan yapmağa azır. Erdoğan, Berlin migrantlar içün lagerlerge para bermese, qaçaqlarnı Almaniyağa yollaycağını ayttı.
Fevralniñ 27-nde Suriye prezidenti Başar Asad quvetleriniñ memleketniñ şimal-ğarbinde yapqan ücümi neticesinde eñ az 33 türk askeri elâk oldı, 36-sı yaralandı.
Soñki aftaları Suriye prezidenti Başar Asadnıñ ordusı Rusiyeden destek alıp, memlekette kontrol etmegen soñki isyancı anklavını yoq etmek içün ücüm etti. Böyle etip İdlib vilâyetiniñ cenübinde ve qomşu Aleppo vilâyetinde topraqlarnı zapt etti.
Türkiye, muhalifetke yardım etmek içün Asadnıñ ücümine cevap olaraq İdlibte askerleriniñ sayısını arttırdı. Türkiye ordusınıñ yardımınen silâlı muhalifetniñ ğalebeleri aqqında haber etile. Berilgen malümatqa köre, olar İdlib vilâyetindeki Sarakib şeerini kontrol altında aldı ve Aleppodan Dimaşqqa yolnı qapattı.
Suriyedeki zıddiyet doquz yıl evelsi Asadnıñ rejimine qarşı kütleviy aktsiyalardan soñ başlandı. Narazılıqlar küçnen bastırıldı, memlekette isyan başlandı. Memleket onlarnen taqımnıñ kontroli altında olğan rayonlarğa bölündi. Topraqlarnıñ bir qısmı «İslâm devleti» terror taqımınıñ kontroline keçti.
