Resmiy Ankara 2014 senesi martnıñ 16-nda Qırımda keçirilgen «referendumnı» tanımay ve Ukraina topraq bütünligine qoltutqanını daa bir kere tasdıqlay. Böyle bir beyanatnı Türkiye Tış işler nazirligi martnıñ 16-nda aydınlattı.
«Ukrainağa bağlı Qırım Muhtar Cumhuriyeti, beş yıl evelsi bugün (martnıñ 16-nda) teşkil etilgen qanunsız referendumğa esaslanıp, Rusiye Federatsiyası tarafından halqara uquqqa zıt şekilde ilhaq etilgendir. Şu sebepten bu areket neticesinde meydanğa kelgen faktik vaziyetni tanımağanımıznı daa bir kere tekrarlaymız», – dep aytıla beyanatta.
Nazirlikniñ qayd etkenine köre, qırımtatarlarnıñ vaziyeti Türkiye içün müim mesele olıp qala.
«Türkiye, qırımtatarlarnıñ tarihiy vatanları Qırımda, öz kimliklerini qorçalap, telükesizlik ve barışıq içinde yaşamalarına qoltutmağa devam etecekmiz», – dep qayd etti Türkiye Tış işler nazirligi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
