Türkiye Tış işler naziri Mevlüt Çavuşoğlunıñ bildirgenine köre, Ankara Rusiye tarafından zapt etilgen ukrainalı askerlerniñ azat etilüvi içün elinden kelgenini yapmağa devam etecek, dep bildire Qırım.Aqiqat mühbiri.
«Keriç boğazındaki buhrandan soñ prezidentimiz (Recep Tayyip Erdoğan – QA) öz fikrini bildirgen edi, Putinge ricalarını yollağan edi. Biz de em deñizcilerni, em gemilerni azat ettirmek içün elimizden kelgenini yapmağa devam etecekmiz», – dedi Çavuşoğlu fevralniñ 1-nde Odesadaki matbuat konferentsiyasında Qırım.Aqiqat mühbiriniñ sualine cevap berip.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
