Türkiye Tış işler naziri Mevlüt Çavuşoğlu, Ankara S-400 Rusiye sistemalarını satın alsa da, Qırım ilhaqı mevzusında Rusiye akimiyetinen razı degil, dep bildirdi. Bu aqta o, Sloveniyanıñ Bled şeerinde teşkil etilgen Strategik forumda çıqışta bulunıp ayttı, dep haber ete «Ukrinform».
«S-400-ni almağa mecbur edik. Çünki bu bizim acele ihtiyacımız. ABD-den ala bilsek, Patriot alırmız. Alıp olamasaq da özümiz işlep çıqarğanına qadar ava mudafaa sistemasını Rusiyeden alacaqmız», – dedi Çavuşoğlu.
Nazirniñ qayd etkenine köre, Türkiye Rusiyenen yaqın olsa, memleketniñ Ğarptan uzaqlaşqanı ya da Ankaranıñ printsipial meselelerde, hususan Qırım işğali meselesinde fikri deñişkeni yoq.
«Tabiiy gaz ihtiyacımıznıñ 50%-ını Rusiyeden qarşılaymız, ancaq Almaniya ihtiyacınıñ 100%-ını Rusiyeden satın ala. Rusiyeden S-400 alamız. Ancaq mevzu Qırım, Gürcistan ya da Moldova olsa, fikirlerimiz bir degil. Rusiye ile Suriye meselesinde beraber çalışamız, ancaq ara-sıra fikirlerimiz farqlı ola. Bir memleket ile ticaret yapmañız dünyanıñ diger memleketlerinen bağlarnı üzgeniñizni köstermey», – dedi Türkiye Tış işler naziri.
Diplomat Slovakiya ve Yunanistannıñ Rusiyede işlep çıqarılğan S-300 ava mudafaa sistemaları bar, dep hatırlattı.
Ukraina prezidenti Volodımır Zelenskıy avgustnıñ 7-nde Ankarada Türkiye prezidenti Recep Tayyip Erdoğan ile körüşti. Olar Donbastaki cenk, Qırım ilhaqı ve yarımadada qırımtatarlarnıñ taqip etilüvi, iqtisadiy işbirligi ve yol ve ava limanlarınıñ beraberlikte qurulması aqqında laf ettiler.
Ukraina prezidenti Volodımır Zelenskıynıñ Türkiye ziyareti vaqtında yanında olğan qırımtatar lideri Mustafa Cemilev Erdoğannıñ Türkiye Rusiyeniñ Qırım ilhaqını iç bir vaqıt tanımaycağına dair beyanatı qırımtatarlar içün pek müim ola, dep bildirdi.
Ukraina prezidentiniñ ofisi Erdoğan Ankara Ukrainanıñ topraq bütünligine qoltutmağa devam etkenini ayttı, dep bildirdi.
