Ukraina prezidentiniñ qırımtatar halqı işlerinden vekâletlisi Mustafa Cemilev Türkiye Tış işler naziri Mevlüt Çavuşoğlu ile körüşti, subetdeşler Rusiyeniñ soñki istilâiy areketlerini ve qırımtatarlarnıñ tutıp alınmasını muzakere etti. Bu aqta Ukraina prezidentiniñ qırımtatar halqı işlerinden vekâletlisiniñ matbuat hızmeti Facebookta haber ete.
«Türkiye Cumhuriyetiniñ tış işler naziri qırımtatar halqına qoltutqanını daa bir kere qayd etti», – dep aytıla haberde.
Haber derc etilgende Türkiye Tış işler nazirliginiñ saytında Mevlüt Çavuşoğlunıñ Mustafa Cemilev ile körüşkeni aqqında malümat yoq edi.
Daa evel qırımtatar halqınıñ lideri, Ukraina halq deputatı Mustafa Cemilev Türkiye prezidenti Recep Tayyip Erdoğan tarafından Rusiye tarafına «azat etilecek ukrainalı siyasiy mabüsler cedveliniñ» berilmesi aqqında tafsilâtlarnı paylaşqan edi.
Mustafa Cemilev Qırım.Aqiqatqa izaat berip, cedvelge işğal etilgen Qırımda Rusiye uquq qoruyıcıları tarafından apiske alınğan Ukraina vatandaşları kirdi, dep qayd etti. Cemilevniñ aytqanına köre, Erdoğan cedvelni Vladimir Putinge yaqın olğan insan üzerinden yetkizdi.
Bundan evel Türkiye prezidenti Recep Tayyip Erdoğan, Rusiye tarafına azat etilecek ukrainalı siyasiy mabüslerniñ cedvelini bergenini ve bu meseleniñ muvafaqiyetli çezilecegini beklegenini bildirgen edi.
Türkiye prezidenti Recep Tayyip Erdoğan qırımtatarlarnıñ milliy lideri Mustafa Cemilevden «Putin ile laf etilecek» Kremlniñ ukrainalı esirleriniñ cedvelini bermege rica etken edi.
