Türkiye Tış işler naziri Mevlüt Çavuşoğlu «Qırım davasınıñ qararlı imayecisi olaraq qırımtatarlarnıñ er vaqıt yanındamız», dep bildirdi. Bu aqta diplomat Ukraina Tış işler naziriniñ birinci muavini Emine Ceppar ile körüken soñ ayttı.
Çavuşoğlu qayd etkenine köre, Ceppar ile muzakereler vaqtında taraflar «munasebetlerimizni ve regional meselelerni» muzakere etti.
O, Ukrainağa «Azerbaycan topraq bütünligine qol tutqanı» içün teşekkürler bildirdi.
Ceppar, «Mevlüt Çavuşoğlunen soñki aftada ekinci kere körüşip, strategik ortaqlıq ve regional meselelerimizni muzakere etmege memnün oldı», dep bildirdi.
«Türkiye – bizge areketlerinen qol tutqan, Qırım işğalini bir vaqıt qabul etmeycek ve Ukraina ve teşebbüslerimizniñ yanında olğan azır olğan strategik ortağımız», – dep yazdı Ceppar Twitterde.
Resmiy Kyiv, Türkiye Qırımnı işğalden qurtaruv platformasına qoşulacaq, dep bekley.
Ukraina prezidenti Volodımır Zelenskıy bildirgenine köre, Avropa Birliginiñ liderleri ABniñ Rusiyege qarşı sanktsiyaları Ukraina suvereniteti ve topraq bütünligi tolusınen ğayrıdan tiklengenine qadar devam etecek ve AB Qırımnı işğalden qurtaruv platformasına qoşulmağa azır, dep işandırdı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
