İyülniñ 10-nda Sankt-Peterburgda başlağan Rusiye-Türkiye cemaat forumında Rusiye ilhaq etken Qırım vekillerine qoşulmağa izin berilmedi. Bu aqta «RİA Novosti» Rusiye agentligi haber ete.
Rusiye kontrolindeki «Qırımnıñ daimiy temsilciligi yanındaki halqara-uquqiy meseleler boyunca işçi gruppanıñ» reberi Aleksandr Molohovnıñ agentlikke bildirgenine köre, o, Sankt-Peterburgğa barıp, «tedbir teşkilâtçılarınıñ davetinen Qara deñiz yanı problemlerinen bağlı Qırım cemaatınıñ fikirlerini bildirmek kerek edi».
«Faqat bu ve diger meseleler boyunca tolu munaqaşa, ğaliba, olmaycaq – soñ daqqada Türkiye tarafı (Rusiye tarafından ilhaq etilgen – QA) Qırımdan er angi delegatnıñ iştirakini imkânsız tanıdı, bu şaşırdı ve yazıqsındırdı», – dep bildire Molohovnıñ aytqanlarını «RİA Novosti».
Rusiye Federatsiya Şurasınıñ ilhaq etilgen Qırım azası Olga Kovitidi, onıñ malümatına köre, Sankt-Peterburgdaki beşinci Rusiye-Türkiye forumında Qırım vekilleriniñ iştirakine qarşı çıqqan «Türkiye tarafını» takbih etti. Bu aqta senatornıñ matbuat hızmeti bildire.
«Türkiye yatırım, mudafaa, gaz, turizm saalarında memleketimiznen olğan munasebetlerini faal sürette inkişaf ettirgen Rusiyeniñ müim tış ticaret ortağı olğanına baqsañ, Türkiyeniñ Qırım fikirleri şaşırta, – dep bildirdi Kovitidi. – Qırım eyyeti azalarınıñ beşinci Rusiye-Türkiye forumında iştirakini imkânsız sayğan Türkiye tarafınıñ fikiri medeniy dünyada qabul etilemez ve takbih etilmeli».
Senatornıñ fikirince, Türkiye tarafınıñ areketleri Rusiye-Türkiye munasebetlerine menfiy tesir ete.
Beşinci Rusiye-Türkiye forumı bugün Sankt-Peterburgda başladı. Türkiye tarafınıñ işbu tedbirde Qırım vekilleriniñ iştirakine dair açıq izaatları yoq.
Fevral ayında Türkiye Tış işler naziri Mevlüt Çavuşoğlu Ukraina Tış işler naziri Pavlo Klimkin ile Odesada yapqan matbuat konferentsiyasında Türkiye Ukrainanıñ topraq bütünligi ve sıñırlarnıñ deñişmeycegine qoltutıp, qırımtatarlarnı qoruycaq, dep bildirgen edi. Onıñ qayd etkenine köre, Ankara «Qırım ilhaqını takbih ete ve iç bir vaqıt onı tanımaycaq».
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, diger strategik obyektlerni zapt etip, Ukraina ordusınıñ areketlerini blok etken edi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
