Türkiye Ukrainanıñ devlet sıñırları ve topraq bütünligine qoltutıp, Rusiyeniñ Qırım ilhaqını tanımaycaq.
Bunı Türkiye Cumhuriyeti Tış işler naziriniñ muavini Yavuz Selim Kıran Ankarada Ukraina-Türkiye diplomatik munasebetleriniñ 100 yıllığına bağışlanğan konferentsiyada ayttı, dep bildire «Ukrinform».
«Ukraina – Türkiye Cumhuriyetiniñ tış siyasetinde merkeziy yerlerden birini alğan işançlı bir ortaqtır. Türkiye Ukrainanıñ topraq bütünligi ve devlet sıñırlarına er daim qoltutqan edi ve qoltutmağa devam etecek, em de Ukrainadaki vaziyetniñ barışıq usullarnen al etilmesi içün ğayret kösterecek», – dep qayd etti Yavuz Selim Kıran.
2016 senesi avgustnıñ 20-nde Türkiye Cumhuriyetiniñ prezidenti Recep Tayyip Erdoğan Ukraina prezidenti Petro Poroşenko ile telefonda laf etip, Ukraina topraq bütünliginen bağlı fikirleri deñişmegenini qayd etti. Türkiye prezidenti, Türkiye Cumhuriyeti Qırım işğalini tanımayıp, qırımtatarlarğa yardım köstermege devam etecegini bildirdi.
