Türkiye parlamenti Qarabağğa asker yollama meselesini baqacaq. Buyruq leyhası noyabrniñ 16-nda prezident Recep Tayyip Erdoğan tarafından kirsetildi. Bu aqta «Anadolu Ajansı» Türk haber agentligi bildire.
Ferman metninde Azerbaycanda Qarabağ ve etrafındaki rayonlarda ateş toqtatılğanını monitoring etecek Türkiye ve Rusiyeniñ merkezini quruv aqqında aytıla. Missiya çerçiveleri, erkânı ve iş müddetini prezident memuriyeti belgileycek. Mandat bir yıl devamında olıp uzatıla bile, dep haber ete Azatlıq Radiosı.
Noyabrniñ 10-nda Rusiye ve Azerbaycan prezidentleri ve Ermenistan baş naziri Dağlıq Qarabağda cenk uruşlarınıñ toqtatıluvına dair beyanatnı imzaladılar. Metnine köre, tanılmağan Dağlıq Qarabağ kontrolindeki rayonlar Azerbaycan kontroline qayta, Qarabağnı Ermenistan ile bağlağan Laçin koridorı boyunca Rusiye barışıq küçleri yerleşecek.
Vesiqada Türkiye barışıq küçleri aqqında aytılmay. Faqat Baqu olarnıñ zıddiyet alanında olmasını talap ete. Kremlniñ matbuat kâtibi Dmitriy Peskov barışıq missiyasında Türkiyeniñ iştirak etüvi meselesinde «añlaşma yoq», dep bildirgen edi. Onıñ aytqanına köre, Rusiyeniñ Türkiye ile işbirligi «Azerbaycandaki merkez çerçivesinde olacaq».
Rusiye Tış işler naziri Sergey Lavrovnıñ bildirgenine köre, Türkiye arbiyleri Dağlıq Qarabağğa kirip olamaz.
