İyülniñ 24-nden itibaren İstanbulnıñ tarihiy qısmında yerleşken eski pravoslav kilsesi ve müzey ve Türkiye qararınen kene cami olğan Ayasofyada musulmanlarnıñ cuma namazı qılınacaq, dep bildire Azatlıq Radiosı.
Prezident Recep Tayyip Erdoğan ve yaqınlarınıñ cuma namazında olması beklenile.
Binanıñ bizans hristian mozaikaları ibadet vaqtında basmalarnen qapatılacaq.
İyülniñ 10-nda Türkiye Danıştayı memleketniñ akimiyetine İstanbuldaki Ayasofyanı cami olaraq ibadetke açmağa izin berdi. O künü prezident Recep Tayyip Erdoğan buyruqnı imzaladı.
Dünya memleketleriniñ ekseriyeti Türkiye akimiyetiniñ mezkür qararını tenqit etti.
Prezident Erdoğan Ayasofya turistler ve farqlı din insanları içün açıq olacaq, dep söz berdi.
Kilse bizans imperatorı I Yustinian emrinen 532-537 yıllarda quruldı. Ayasofya tahminen biñ yıl devamında Hristian aleminiñ eñ büyük kilsesi olğan edi.
1204-1261 yıllarında yunan ortodoks kilsesi roma-katolik kilsesi oldı. Bu Latin imperatorlığı vaqtında kerçekleşti.
1453 senesi, Osmanlı imperatorlığı Konstantinopolni zapt etken soñ, kilse cami oldı. Binağa dört minare qoşuldı.
1934 senesi Ayasofya müzey oldı. Al-azırda müzey UNESCO dünya mirası cedveline kire.
Er yıl Ayasofyanı millionlarnen turist ziyaret ete. İstanbul akimiyetiniñ malümatına köre, 2019 senesi müzey 3,7 million turist tarafından ziyaret etildi.
