Türkiye, koronavirusnıñ yayılmasına qarşı çıqmaq içün halqara uçuşlarnı toqtattı. Bunı Türkiye Cumhuriyetiniñ prezidenti Recep Erdoğan martnıñ 27-sinde ayttı. Martnıñ 27-sinde Türkiyede yañı COVID-19 infektsiyasında 92 adam öldi, haber ete "Anadolu" Türkiye haber agentligi.
Erdoğan televizion hitabında, bütün uçuşlar bilinmegen müddetke toqtatılğanını ayttı. Ülke içindeki uçuşlar aqqında qararnı ise yerli bölge akimiyeti alacaq, haber ete Azatlıq Radiosı.
Türkiye prezidenti qayd etti ki, memlekette hastahanelerniñ donamta seviyesi yüksek ve respiratorlarnıñ istisalı ep çoqlaşa.
Erdoğan telâşlanmamaq ve raat olmağa çağırttı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
