Keçken künü Qırımda koronavirus yuqunçı sebebinden altı adam öldi. Buña Qırımnıñ işğalci Sağlıq saqlav nazrliginiñ malümatı delâlet ete. Böylece, pandemiya başlağanından berli Qırımda bu hastalıqtan ölgenlerniñ sayısı 218 oldı.
"2749 adam (covid) ambulator tedaviylevde buluna, 2372 - hastahanede (covid ve pnevmoniya) tedaviylene, 30 - observatorlarğa alındı", – dep yazıla bildirmede.
Pandemiya başlağanından 12522 Covid-19 hastası qayd etilgen, 8080 tedaviylengen soñ hastahaneden çıqarılğan.
Tünevin Qırımda 155 yañı koronavirus hastası qayd etilgen edi.
Aqyarnıñ işğalci başlıqlarınıñ soñki malümatına köre, şeerde yılnıñ başından 3 525 adam yañı koronavirus yuqunçına oğrağan, 2630 tedaviylengen, 95 ölgen.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
