Aqyarda Rusiye arbiyleri «Qalqan ve qılıç» arbiy-taktik oyunını keçirdi. Anda «Yunarmiya» bala arbiy areketiniñ iştirakçileri ve «Artek» bala merkeziniñ vekilleri yarışlaştı. Bu aqta Rusiye Mudafaa nazirligi Cenübiy arbiy okrugınıñ matbuat hızmeti bildire.
Müessise malümatına köre, «Yunarmiya» iştirakçileri ve «Artek» temsilcileri köçüci lager yapıp, pnevmatik tüfekten ateş açtı ve uzaqqa granata attı.
«Yaş vatanperverler bölük erkânlarında sundurma keçitleri ve mania yolaqlarından keçüvde yarışlaştı, sanitar yarışlarında iştirak etti ve qurum yırlarını icra etüvde yarışlaştı», – dep bildirdi arbiy müessise.
Rusiye Mudafaa nazirliginiñ malümatına köre, atıştan soñ balalarğa qarabuğday botqasını berdiler. Oyunda 60-qa yaqın insan iştirak etti.
Daa evel noyabrniñ 10-ndan dekabrniñ 1-ne qadar «Artekte» Rusiye arbiyleri 300-den çoq bala içün «arbiy-vatanperverlik aktsiyalarını» keçirdi.
Ukraina aq qorçalayıcıları işğal etilgen Qırımda balalarğa arbiy mevzu aşlatıla, dep bir çoq kere aytqan edi. Psihologlar zemaneviy Rusiye tasilinde balalarnıñ añlavına basqı yapılğanını qayd ete.
«Yunarmiya» areketi Rusiye Mudafaa nazirliginiñ teşebbüsinen ve Rusiye prezidentiniñ desteginen qurulğan edi. 11 yaşından 18 yaşına qadar mektep talebesi «Yunarmiyanıñ» azası ola bile. Bu areket Qırımda 2014 senesi Rusiye yarımadanı işğal etken soñ inkişaf etti.
