Tış işler naziri Andriy Sıbiğa, ABD devlet kâtibi Marko Rubio, em de Avropa tış işler nazirleri ve AB diplomatiyasınıñ yolbaşçısınen "Ukrayina içün barışıq ve telükesizlik kefaletlerine bağışlanğan müim subette" iştirak etkenini bildirdi.
"Ukrayinanıñ telükesizlik kefaletleri konkret, uquqiy ceetten mecburiy ve semereli olmaq kerek, degen noqta-i nazarını tasdıqladım. Olar çoq taraflı olmalı, arbiy, diplomatik, uquqiy ve diger seviyelerden ibaret olmalı. Epimiz, Ukrayina ordusı er angi kefaletniñ esas elementi ola, dep tüşünemiz, bunıñ içün onıñ maksimal quvetleştirüvi — bizim esas prioritetimiz", — dep yazdı nazir içtimaiy ağda.
Sıbiğa, subet vaqtında Ukrayina barışıqqa doğru nevbetteki adımlarnı atmağa azır olğanını tasdıqlağanını qoştı.
"Biz er bir formatta ve coğrafiy bölgede liderler seviyesinde körüşüvlerge azırmız. Biz cinayetlerni toqtatmağa ve diplomatiyağa bir şans bermege azırmız. Moskva añlamaq kerek ki, ebediyen böyle uzatıo olamaz. Rusiye barışıqqa doğru yapıcı adımlardan vazgeçse, aqibetlerni körmek kerek: sanktsiyalarnıñ ciddiy artması ve Ukrayinanıñ imkânlarınıñ quvetleştirüvi", — dedi nazir ve ittifaqdaşlarğa destek ve birlik içün teşekkür bildiridi.
ABD Devlet departamenti, bu subet vaqtında taraflar "Rusiye ve Ukrayina arasındaki cenkni uzun müddetli çezüv yolunen toqtatmaq içün diplomatik ıntıluvlarda işbirlikni devam etmege añlaştılar" dep bildiridi.