«Okean Elzı» gruppasınıñ lideri ve cemaat erbabı Svâtoslav Vakarçuk mayısnıñ 16-nda «Ses» («Ğolos») siyasiy firqası qurulğanını ilân etti. Onıñ aytqanına köre, bu siyasiy küç Yuqarı Rada saylavlarında iştirak etmege planlaştıra, dep bildire Azatlıq Radiosı.
«Bizler, «Ses» firqası, eski siyasetni yoq etmek ve yañısını yaratmaq içün parlamentke ketemiz. Bizge kerçek deñişmeler ketirecek siyasetni yapacaqmız», – dep ayttı firqa qurucısı.
Vakarçuk 2007-2008 seneleri Yuqarı Rada deputatı olğan edi, o, nevbetten tış saylavlarda «Naşa Ukrayına – Narodna samooborona» blokunıñ cedveli boyunca saylanğan edi. 2008 senesi dekabrniñ 16-nda deputat vekâletlerini taşlap ketti.
2019 senesi prezident saylavları ögüne içtimaiyatçılar Vakarçuknı ola bilecek namzetler cedveline kirsetti, amma o, namzetini köstermekten vazgeçti.
