Bağçasaraydaki «Hizb ut-Tahrir davasınıñ» mabüsi Enver Mamutov Rostov-na-Donu SİZOsınıñ mahsus blokunda «suvuq, böcekler olğanını ve tavandan suv aqqanını» haber etti. Bu aqta Radio Svoboda rus hızmetiniñ mühbiri Anton Naumlük bildirdi.
Haber etile ki, Mamutov, Rusiye insan aqlarından vekâletlisi Tatyana Moskalkovağa muracaat etip, mahsus blokundaki şaraitlerni şikâyet etti.
Advokat Emil Kürbedinov da mabüsni tutuv şaraitlerini şikâyet etmege niyetlene. Advokat, SİZOdan Mamutovnı tutuv şaraitleri ne içün deñiştirilgenini añlatmasını talap etip, nezaret organlarına narazılıq bildirecek ola.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
Bu sene dava mabüsleri Qırımdan qomşu Rusiyege avuştırıldı. Rostov-na-Donudaki Şimaliy-Kavkaz okrugınıñ arbiy mahkemesi olarnıñ davalarını baqmaqta.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
