Qırımnıñ Rusiye yolbaşçısı Sergey Aksenov emin ki, Qırımda yağanaqlar yağmasa da, suv qıtlığı bir daa olmaycaq. Onıñ hatırlatqanına köre, Aqmescit ve Aluştada eki suv toplağan anbar quruluvı planlaştırıla. Bu aqta o, avgustnıñ 10-nda Qırım kütleviy haber vastalarına ayttı.
Aksenovnıñ malümatına köre, Aluştada 8 mln kubometrlik suv anbarı, Aqmescitte 15 mln kubometrlik suv anbarını qurmağa isteyler.
Onıñ bildirgenine köre, Yaltada deñiz suvını tatlılaştırmaq içün kerek olğan tehnik vesiqalarnı azırlap başlağanlar.
«Yaltada qarar alındı. Anda tehnik-iqtisadiy vesiqalar azırlanıla. Ava aynı olsa da ve yağanaqlar yağmasa da, başqa problemimiz (qurğaqlıqnen bağlı suv qıtlığı – QA) olmaycaq, dep tüşünem», – dep bildire Aksenovnıñ aytqanlarını TASS agentligi.
Qırımnıñ «Ekologiya ve dünya» birleşmesiniñ reisi Viktor Tarasenko Rusiye akimiyetiniñ yañı suv anbarlarını quruv planlarını izaatlap, Qırımnıñ ekologik sistemasına kirişüvde pek diqqatlı olmalı, dep qayd etti. O, bunıñ neticesi yer yılışması ola bile, dep ayttı.
Rusiye akimiyeti Kyivni Qırım yarımadasınıñ «suv qamaçavında» qabaatlay. Ukrainanıñ BM monitoring missiyası Qırım yarımadasınıñ işğali sebebinden «Rusiye Qırımda insanlarnıñ suv teminatından mesüliyetli ola», dep israr ete. Ukraina akimiyeti Qırım işğali bitken soñ yarımada Dnipro suvını alacaq, dep bildire.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
